തെന്നിന്ത്യൻ സിനിമാലോകത്തെ തിളക്കമാർന്ന താരം നയൻതാര ആരാധകർക്ക് ജന്മദിന സമ്മാനമായി പുതിയൊരു ആക്ഷൻ ചിത്രം പ്രഖ്യാപിച്ചിരിക്കുകയാണ്. ‘റക്കായി’ എന്ന് പേരിട്ടിരിക്കുന്ന ഈ സിനിമയുടെ ആവേശകരമായ ടീസർ ഇന്ന് പുറത്തുവന്നു.
വ്യത്യസ്തമായൊരു ആക്ഷൻ അവതാരമാണ് ഈ ചിത്രത്തിൽ നയൻതാര അവതരിപ്പിക്കുന്നത്. അരിവാൾ കൊണ്ടുള്ള പോരാട്ട രംഗങ്ങളിലൂടെ പ്രേക്ഷകരെ ഞെട്ടിക്കുന്ന ടീസർ, ഈ ചിത്രം ഒരു പവർഫുൾ പീരിയഡ് ആക്ഷൻ എന്റർടെയ്നർ ആയിരിക്കുമെന്ന് സൂചിപ്പിക്കുന്നു. “ഷി ഡിക്ലയേഴ്സ് വാർ” എന്ന ആകർഷകമായ ടാഗ് ലൈനോടെയാണ് ചിത്രം എത്തുന്നത്.
മികച്ച സംവിധായകനായ സെന്തിൽ നല്ലസാമി ഈ ചിത്രത്തിന്റെ സംവിധാന ചുമതല വഹിക്കുന്നു. ഡ്രംസ്റ്റിക്സ് പ്രൊഡക്ഷൻസും മൂവി വേഴ്സ് സ്റ്റുഡിയോസും സംയുക്തമായാണ് ഈ വൻ ബജറ്റ് ചിത്രം നിർമ്മിക്കുന്നത്.
സംഗീത ലോകത്ത് തനതായ വ്യക്തിമുദ്ര പതിപ്പിച്ച ഗോവിന്ദ് വസന്ത ആണ് സംഗീതം ഒരുക്കുന്നത്. മികച്ച ഛായാഗ്രാഹകനായ ഗൗതം രാജേന്ദ്രൻ ക്യാമറ നിർവഹിക്കുമ്പോൾ, എഡിറ്റിംഗ് മേഖലയിൽ തന്റേതായ സ്ഥാനം നേടിയ പ്രവീൺ ആന്റണി ആണ് എഡിറ്റിംഗ് നിർവഹിക്കുന്നത്.
ഇന്നലെ പുറത്തുവന്ന പോസ്റ്റർ ഏറെ ശ്രദ്ധ നേടിയിരുന്നു. അതിനു തൊട്ടുപിന്നാലെയാണ് ഈ സ്റ്റൈലിഷ് ടീസർ എത്തിയത്. നിറയെ ആക്ഷനും സംഘർഷഭരിതമായ സന്ദർഭങ്ങളും നിറഞ്ഞ ഒരു പീരീഡ് ചിത്രമായിരിക്കും ഇതെന്ന് ടീസറിലൂടെ വ്യക്തമാകുന്നു. തെന്നിന്ത്യൻ സിനിമയിൽ നയൻതാരയുടെ ഏറ്റവും വലിയ ചിത്രങ്ങളിലൊന്നായി ‘റക്കായി’ മാറുമെന്നാണ് സൂചന.
English Summary:
